الجمعة، 12 فبراير 2010

بياعين الوهم

821093

لو انت حريف طاوله محبوسه  او 31 ؟

اتصل على 099000000  هتكسب 3000 جنيه

لو انت بتحب الاغانى؟

اتصل على محمول 4000 هتشارك فى مسابقه وتكسب كاست

لوانت تخين وعايز تخس؟

اتصل على 0999999999 هتخس 8 كيلو فى ساعه

الحل الوحيد انك تنام عشان ماتتصلشى وتخسر دم قلبك

طيب نمت؟

بتشوف احلام ?

عايز تفسرها؟

اتصل على الشيخ ابو طقيه هيفسرلك احلامك

عايز تنام مرتاح؟

اتصل على  الدكتور المنوماتى وهتنام على السريع قصدى على السرير

اقرفت وكرهت النوم؟

مش قادر تنام؟

  جالك اكتئاب؟

اتصل على العالمه الفلكيه مدام ثنيه كلوبات هتريحك واتخليك تناااااام

سؤال …..

عندك محمول؟

ناوى اتسلى نفسك بدل مااتنام؟ 

اتصلى على 09009999999 هتنزل لعبة الذبابه الشقيه وممكن لعبة البرغوط الدكر او الخنفسه العذراء

عايز تشجع منتحب بلدك؟

اتصل على 09007777777 هتنزل اغانى بالعبيط بس المهم اتصل

قرفان ؟

المدام وحشه؟

اتصل على سلومه الاقرع

قرفان من حماتك؟

اتصل على السلخانه

قرفان من حياتك واكرهت التلفزيون؟

 اتصل على 09001111111 علشان نرسل لك حد يشتريه منك

جوعت ؟؟؟

 اتصلى على 09006677777  هنبعتلك اكل جاهز وعليه حله هديه

عندك انبوبه ؟

طيب ناوى اتجازف بحياتك وتشترى واحده ؟

خايف على عمرك وعايز تريح نفسك؟

اتصل على 0900909090 هنعتذر لك لعدم توفر الانابيب فى مصر حاليا

ممكن تشترك فى مشروع انبوبه لكل مواطن

جتلك حاله نفسيه ؟

ناوى تنتحر ؟

اتصل على الاسعاف والنجده وطبعا مافيش حد هيعبرك

عايز حل ؟

اتصل على 0999000999 هنبعتلك اسعاف طاير ومعاه هديه كفن كشمير

اقرفت من البوست؟

  اتصل على 0900000001 هيولعولك فى المدونه وترتاح

الله يرحم ايام " هات لنا ريرى " " وهتجوزونى ……عبد الرحيم عمرو"

اصبحنا فى زمن بياعين الوهم

 

هناك 18 تعليقًا:

الملاك الحزين يقول...

مممممممم

ايه الصباح السكر دا وكمان أول كومنت

واووووووووووووووو

عيد حب سعيد عليك وربنا يكرمك يارب

الملاك الحزين يقول...

صباح الفل والورد والياسمين

جمعه مباركه عليك وعلى الامة الاسلاميه جمعاء

الملاك الحزين يقول...

تعرف بجد بوست ميه ميه
ناس كتير محتاجه تفهم ان كل دا وهم ونصب علنى
هو دا الشعب المصرى دايمآ من طيبة قلبه بيصدق وبيجرى ورا الاحلام الزائفه استاذ عصام
ربنا يهدى الجميع يارب
تدوينه اكتر من روعه

وعجبتنى الحته دى اكتر ضحكت جامد كده على الصبح
اتصل على 09000000000001 هيولعولك فى المدونه وترتاح الله يرحم ايام " هات لنا ريرى " " وهتجوزونى ……عبد الرحيم عمرو" اصبحنا فى زمن بياعين الوهم

ههههههههههههههه
صباحك أحلى من السكر يا سكر
ابقى طمنى عليك
ايناس

عصـــــــــــام الــــديــن يقول...

صباح الفل ياايناس
صح ابتسامة ملاك
كل عام وانتم بالف خير بالمناسبه انا عيد الحب بتاعى 8 يناير لان ده اجمل مناسبه خطوبتى على اجمل انسانه
وشرفتينى وصدقينى لو قلتلك اننا فعلا بينضحك علينا فى بلدنا
واللى اغرب ان العرب كلهم بيضحكوا علينا تخيلى كنت قاعد امبارح بتفرج على فلم على قناة سينما اتفجئت باكتر من 20 اعلان للاتصال على 0900 حتى انا خلاص خدت قرار الغى شغلى واشترى رقم 0900واشتغل بيه الناس
صباحك سكر زياده

خديجة علوان يقول...

صفصافة الخير

أوراقها نبض قلب يحس أوجاعه والآخرين

ثمارها حروف تخطها ارواح السماء

انها

صفصافة عصام الدين

حيث الوجع يقهقه ضاحكا من فصول الحياة ومفارقاتها

مدونة تقول الكثير مما نود ان نقوله

ابدعت اخي
دام ألقك

hana يقول...

ياربي هههههههههه
طب فهمت اللي مكتوب
إتصل بـ 00000 تكسب بوست هدية هههههههههه

دأنا باموت ياربي وانا باتفرج على كدة
يااه المشكلة أنه الناس مش عاوزة تفهم انه مجرد وهم
وكل واحد بيتشعبط في حلم انه يفوز
ويقول اما اتصل ههههههههه
لا عارف بئا اللي بيجنني خالص أنه الاقي
برنامج كله جوايز تحل صح تأخد جايزة قولت اورايت
انما تحل غلط تاخد جايزة لا ومش واحدة
دة مليون جايزة بس إتصل
ههههههههه

ياربي انا نفسي افهم الناس مالها مش عاوزة تفهم ليه

بوست يجنن يا عصام بجد
وبيناقش مشكلة كبيرة أوي
وانا من موقعي هذا باتمنى اجيب خط 0900
واشتغل يعني أهو أحسن من مفيش ههههههه

☼♫♪ عمــاد الدين يــوسف ☼♫♪ يقول...

ههههههههههههههه

بصراحة انت شـرَّحت ولاد الابالسه اللي بيتاجروا بكل شيء حتى بهموم الناس التعبانه في سبيل الفلووس

تحياتي
مستنيك تشرفني تاني في مدونتي

حسن ارابيسك يقول...

الصديق العزيز/ عصام الدين
أولا لم يفتني التعليق لعلى رائعتك السابقة على ضفاف الحب
ثانياً
ما تتحدث عنه اليوم وتشير إليه لك بالطبع كل الحق واتهامك لهم صادق لم يخلو من الإفتراء
انه نوع جديد من الوهم
وما أكثر الغلابة لدينا ولا نلومهم بتعلقهم بأي شئ وان كان وهم يبنون عليه الكثير من الأحلام المؤقتة الغير قابلة للتنفيذ ولكنها قابلة للتنفيس
تحياتي
حسن أرابيسك

قيس بن الملووووح يقول...

المشكلة المعروضه علي مدونتي قد تستفيد منها للمستقبل
زورنا شاركنا الراي

يا مراكبي يقول...

بوست جميل وعنوان معبر

فعلا .. الموضوع ده بقى سخيف جدا .. قمة الإستهزاء بالناس وقمة النصب في وقت واحد .. وأنا دايما بسأل: هو فيه ناس فعلا بتتجاوب معاهم للدرجة دي؟ الاجابة للأسف أيوه .. الهايفين كتير .. والا ما كانش ده بقى بيزنس كبير قوي كده

عصـــــــــــام الــــديــن يقول...

خديجه علوان
واحده من اجمل الشاعرات التى قرات لهم
لغه ادبيه خاصه وعاليه جدا صور بلاغيه رائعه احساس مرهف
كل الشكر على زيارتك لمدونتنا المتواضعه
وننتظرك دائما مبدعه ومشرقه
تحياتى

عصـــــــــــام الــــديــن يقول...

hana
هنونه الجميله الرقيقه قراشة التدوين
ايه رايك نتشارك فى خط واحد 0900 بس ايه رايك هنلاقى غلابه ننصب عليهم ويتصلوا بينا ؟ هنعرف نبيعلهم الوهم ولا على حظنا هيفوقوا ويبطلوا يتصلوا ؟ وساعتها هنقضيها معاكسات
نورتينا
تحياتى

عصـــــــــــام الــــديــن يقول...

عماد الدين يوسف
الشاعر الجميل والصحفى الرائع
اعتز ياصديقى بزيارتك الجميله التى ازالة اثار سوء فهم غير مقصود
يارب دائما نستمتع بابداعاتك وارائك المحترمه
وبخصوص بياعين الوهم اسال حضرتك سؤال
من المسؤول عن المشكله ؟ الناس المخدوعه الباحثه عن اى فرصه للخروج من النفق المظلم ام مستثمرون لا يهمهم سوى اللهث خلف الاموال باى طريقه شرعيه كانت ام غير شرعيه حلال ام حرام ؟ ام هناك من هو مسؤول اكثر عن احداث النصب 0900 وهو المسؤول الذى سمح لهم باستخدام خطوط الاتصالات المصريه للنصب تحت سمع وبصر المسؤولين
تحياتى

عصـــــــــــام الــــديــن يقول...

حسن ارابيسك
الصديق الجميل
والشاعر المرهف الحس جراح الكلمه العربيه
الف حمدا لله على سلامتك وعودتك لنا من جديد
وحشتنا روائعك ومنتظرين الجزء الثانى من حاول تفتكرنى
يارب ديما بصحه وخير
دمت لنا مبدعا
تحياتى

عصـــــــــــام الــــديــن يقول...

قيس ابن الملوح
شكرا لتشريفك ولدعوتك الجميله
اعدك بالمتابعه دوما
تحياتى

عصـــــــــــام الــــديــن يقول...

يامراكبى
المهندس احمد القاضى
شرفتنا ياهندسه
بصراحه موضوع 0900 ليس هو كل الحكايه القائمه تتسع للمئات من النصب الصريح والنصب الغير صريح
يارب نقدر نقدم عنها فكره ولو بسيطه للناس الغلابه
اما بخصوص المخدوعين فيه مثل فلاحى بيقول"الغريق بيتعلق بقشه"
تحياتى

hana يقول...

هلو عصام
إزيكــ

انا باعتقد لو شاركنا فيها الناس هتفووق على حظنا هههههههه
بس يمكن هيكون اروع ما في الموضوع اننا هنكون سبب دة هههههه

على فكرة القلم كوسيلة لمناقشة القضايا والقاء الضوء على السلبيات
و على حاجات يمكن ماتكونش واضحة عند كثير من النااس
وسيلة رائعة جداً ويمكن توضيحكـ للقضية دي
يعمل وعي أو إعادة شحن لعقول كثير من اللي بيعتقدوا في حقيقة الإتصالات والجوايز من جديد
عن طريق انه الموضوع من الخارج بعيد
عن التلفزيون ويبدأ التفكير فيه من غير تأثير الاعلان

هبة النيـــــل يقول...

ايووة

أهم حاجة إننا نحسسك إن انت مش مزبوط

واللي انت فيه مش طبيعي

يعني مش طبيعي انك رفيع

مش طبيعي انك تخين

مش طبيعي انك تحلم بشجرة ولا بقرة

فعشان تكون طبيعي

اتصل بينا

المهم تتصل وتدفع


اللهم لا حول ولا قوة إلا بالله