الأحد، 4 أكتوبر، 2009

فى حب مصر

سهــى زكــى said...

واحد من الناس
تحياتى لك فى محبسك الغريب
بص بقى تصدقى انى حاسة بقيمة كل ذرة من تراب مصر وكل حاجة وتصرف وكل زبالة وكل جمال وكل تشرد وكل عز ، انا بحب مصر حب مرعب يخلينى كل مرة افكر انى اسافر احس انى رجلة تقيلة ويمكن يصيبنى شلل قبل ما اطلع الطيارة الكلام اللى بقوله دا رغم انه يبان عبيط شوية الا انه حقيقيى جدا انا ممكن اشجع الناس على السفر لاى مكان طالما هايقدروا يسيبوها لكن انا مش عارفة جسمى معجون بطينها تحولنى طوبة تحولنى تمثال تحولنى معجزة انا بحبها وبعشقها وناسى وقهوتى وبيتى وشغلى وعيلتى وحاجاتى الصغننة ونيلى بتاعى هو على فكرة النيلى بتاعى والسما بتاعتها بتاعتى والبحر والنور وكل حاجة فيها بتاعتى بحبها لانها معمولة ليا اما كل السلبيات المقرفة اللى انت قلت عليها فهى موجودة فى كل مكان على الارض ومش فى مصر بس الفرق اننا شعب جهور كدا وغاوى صياح واستعراض وعلى وشك يبان يا نداغ اللبان ، هو دا احنا واضحين لدرجة الفضح وانا بحبها بحبها بحبها وفى قلبى ساكن حبها
انا عارفة قيمتها يا صديقى واحد من الناس من غير ما اتحرك سنتى برا ارضها انا حنظله 2بعشقها بعشقها وبموت فيها
وان خدعتنى الامانى
او راح حبى فى زمانى
ارجعلك انت تانى تانى
ياصاحبة المكان يا اقوى من الزمان
يا حبيبيتى يا مصر
على فكرة لو حد قرا الكلام دا هايضحك عليا وعليك يمكن لكن بجد اللى انا قلته قاصدة كل حرف فيه بما فيه الاغنية بتاعة شادية " " اقوى من الزمان "
نهارك بلون قلبك ويارب يقصر ليالى الغربة على روحك

هناك تعليقان (2):

حسن ارابيسك يقول...

سهى ذكي
قاصة جميلة القلم والإحساس
إنسانة قبل كونها قاصة تتفاعل مع نسيم وتراب بلدها اللي بتحبها حتى النخاع
تحياتي
حسن أرابيسك

عصـــــــــــام الــــديــن يقول...

مررت على مدونتها بالصدفه توقفت امامها تسمرت اقدامى امام كلماتها وجدتنى ادمن قرائتها ادرت محرك البحث اتقصى اثرها وجدتها ترسم بكلماتها لوحات انثوية الطابع واحيانا تنحت منها تماثيل تخرج للماره لسانها وتعريهم لتفضح مابداخلهم من زيف ونفاق
سهى زكى ..... هى من حولتنى دون ان تدرى من شاعر لا يستطيع ان تحمل ابياته كل مابداخله الى هاوى على طريق القصه القصيره تستطيع ان تنقل كلماته مكنونات نفسه دون اى عناء او قيود او تفعيلات
تحياتى